ကျန်းမာရေးနဲ့ မညီညွှတ်တဲ့အိပ်စက်မှုပုံစံ (၄) မျိုး

• အိပ်စက်တဲ့အခါမှာ မှောက်အိပ်ခြင်း၊ သန္ဓေသားသဏ္ဍာန်အိပ်စက်ခြင်း (Fetal position)၊ ခန္ဓာကိုယ်တစ်ဝက်ထိုင် တစ်ဝက်လှဲလျောင်းတဲ့ ပုံစံနဲ့ အိပ်စက်ခြင်း၊ လက်မောင်းပေါ်ခေါင်းအုံးအိပ်စက်ခြင်း များဟာ နံရိုး၊ ကြွက်သားနဲ့ အာရုံကြောများကို ထိခိုက်စေပါတယ်။
• ဘေးတစောင်းအိပ်ခြင်း၊ ပက်လက်အိပ်ခြင်း များဟာ ကျန်းမာရေးနဲ့ ညီညွတ်တဲ့ အိပ်စက်မှုပုံစံများဖြစ်ပြီး အိပ်ယာ နဲ့ အိပ်ခန်း ပတ်ဝန်းကျင် ဟာလည်း အရေးကြီးတဲ့ အချက်တစ်ခုဖြစ်ပါတယ်။ ဒီအချက်တွေကို သေချာသတိထားလိုက်နာပြီး အိပ်စက်မယ်ဆိုရင် နံရိုး၊ကြွက်သားနဲ့ အာရုံကြောထိခိုက်မှုတွေကို လျှော့ချနိုင်သလို အိပ်စက်ခြင်းရဲ့ အကျိုး ထိရောက်မှုကိုလည်း တိုးတက်စေမှာဖြစ်ပါတယ်။

အိပ်စက်ခြင်း ဟာ အရိုးရှင်းဆုံးနဲ့ အထိရောက်ဆုံး အနားယူမှုဖြစ်ပြီး တစ်နေကုန် အသုံးပြုရတဲ့ ခန္ဓာကိုယ်ကို ပြန်လည် အားအင်ဖြည့်တင်းပေးဖို့ တန်ဖိုးအရှိဆုံး ရွှေရောင်အခိုက်အတန့် အချိန် လို့တောင် တင်စားလို့ရပါတယ်။ ပျမ်းမျှအားဖြင့် တစ်နေ့တာမှာ (၆)နာရီ-(၇)နာရီ အိပ်စက်ခြင်းဟာ သင့်လျော်တဲ့ ပမာဏဖြစ်ပါ တယ်။ တစ်နေ့တာအတွင်း အိပ်စက်တဲ့ အချိန်နဲ့ နိုးနေတဲ့အချိန်ကို အချိုးချမယ် ဆိုရင် (၁း၄) လောက်ရှိပါတယ်။ အိပ်စက်ခြင်းအတွက် အချိန်များစွာအသုံးချခြင်း အပြင် အိပ်စက်ရာမှာ မှန်ကန်တဲ့ ပုံစံအနေအထားနဲ့ အိပ်စက်ခြင်းဟာလည်း အရေးကြီးတဲ့ အချက်တစ်ချက်ဖြစ်ပါတယ်။  ဒါဟာ လူတစ်ဦးရဲ့ ယေဘုယျ ကျန်းမာရေးကို အကျိုးပြုစေသလို နံရိုး၊ ကြွက်သား၊ ခန္ဓာက်ိုယ်တစ်ခုလုံးရှိ အာရုံကြောများကို အချိန်မတိုင်ခင် ထိခိုက်စေမှု အန္တရာယ်ကိုလည်း လျှော့ချပေး ပါတယ်။ ဒါပေမယ့်လည်း တချို့လူများအနေနဲ့ အိပ်ချိန်များလေလေ ခန္ဓာကိုယ်က ပိုပြီး ပင်ပန်းနွမ်းနယ်လာလေလေ ဆိုတာမျိုး စိုးရိမ်ကောင်း စိုးရိမ်နိုင်ပါတယ်။ ဒီအတွက် အဖြေကတော့ ပုံစံမမှန်တဲ့ (သို့) မသင့်လျော်တဲ့ အိပ်စက်မှုပုံစံ ကြောင့်လို့ ဆိုရမှာပဲဖြစ်ပါတယ်။ ဒါ့အပြင် အရမ်းမာလွန်း အရမ်းအိစက်လွန်းတဲ့ အိပ်ယာများကြောင့်လည်း ဖြစ်နိုင်ပါသေးတယ်။

၁။ သန္ဓေသားသဏ္ဍာန်(Fetal Position) အိပ်စက်ခြင်း

ဒီပုံစံဟာ ကျောကိုကွေး ခေါင်းကိုအရှေ့ဘက်ကိုင်း တင်ပါးကိုညွတ်ထားပြီး ဒူးကုပ်ထားတဲ့ အနေအထား တစ်နည်းအားဖြင့် မိခင်ဗိုက်ထဲမှာ သန္ဓေသား တည်ရှိနေတဲ့ ပုံစံနဲ့ အိပ်စက်ခြင်းဖြစ်ပါတယ်။ ဒီအနေအထားကိုကြည့်မယ်ဆိုရင် ခန္ဓာကိုယ်ရဲ့ အစိတ်အပိုင်းများစွာဟာ ပုံမှန်မဟုတ်တဲ့အနေအထားမှာ ရှိနေတာကြောင့် ကျန်းမာရေးနဲ့ညီညွတ်မှုမရှိဘူးလို့ ဆိုရမှာပါ။ ဒီလိုပုံစံနဲ့ ကြာရှည်စွာ အိပ်စက်မယ် ဆိုရင် အောက်ဖော်ပြထားတဲ့ ပြဿနာတွေ ကြုံတွေ့လာရနိုင်ပါတယ်။

• ဒူး နဲ့ တင်ပါးတစ်ဝိုက်မှာရှိတဲ့အရွတ်တွေ ရောင်ရမ်းလာပြီး အဆိုနေရာ က အဆစ်နေရာများ ရေရှည်ကွေးညွတ်ထားရတာကြောင့် ဒူးနာခြင်း ဝေဒနာ ဖြစ်လာနိုင်ပါတယ်။
• ဒီပုံစံအနေအထားမှာ နောက်ကျောကွေးညွတ်မှုဒဏ်ကြောင့် ခါးအောက်ပိုင်း နေရာမှာ ရောင်ရမ်းနာကျင်ခြင်းတွေဖြစ်နိုင်ပြီး ခါးကြွက်သားဆန့်ခြင်းနဲ့ တောင့်တင်းမှုများ ဖြစ်လာနိုင်ပါတယ်။
• ကျောရိုးသဏ္ဍာန်မူမမှန်ခြင်း (Spinal Deformities)။
• လည်ပင်းကြွက်သားများ ဆက်တိုက်ကွေးထားရတာကြောင့် ရောင်ရမ်းခြင်း မှ တစ်ဆင့် လည်ပင်းနာခြင်းဖြစ်နိုင်တဲ့အပြင် ၎င်းကြွက်သားများ တောင့်တင်းခြင်း၊ အပေါ်ပိုင်းကျောရိုးကို ဖိအားပိုမိုသက်ရောက်ခြင်းများ လည်းရှိနိုင်ပါတယ်။
• ခါးဆစ်အရိုးနုပြားကျွံခြင်း(Herniated Disk) ခံစားနေရတဲ့ လူနာများ အနေနဲ့ ကျန်းမာရေးအရမသင့်လျော်တဲ့ Fetal Position အနေအထားနဲ့ အိပ်စက်မိမယ်ဆိုရင် နာကျင်မှုကို ပိုမိုဆိုးရွားစေမှာဖြစ်ပါတယ်။

 ၂။ မှောက်အိပ်ခြင်း

မှောက်လျက်အနေအထားနဲ့ အိပ်စက်ခြင်းဟာလည်း ကျန်းမာရေးနဲ့ မညီညွတ် တဲ့ အိပ်စက်မှုပုံစံတစ်ခုဖြစ်ပါတယ်။ မှောက်အိပ်ခြင်းဟာ အသက်ရှူတာကို အဟန့်အတားဖြစ်စေသလို ပုံမှန်မဟုတ်တဲ့ကျောရိုးကွေးညွတ်မှုကိုလည်း ဖြစ်စေ ပါတယ်။ မှောက်အိပ်တဲ့အချိန် ခေါင်းကိုအောက်စိုက်ထားခြင်းဟာလည်း ကွေးညွတ်မှုပုံစံတစ်မျိုးကိုဖြစ်စေပါတယ်။ ဒီအချက်တွေအားလုံးဟာ  လည်ပင်းကြွက်သား ရောင်ရမ်းနာကျင်ခြင်းနဲ့ ခါးနာခြင်းများကို ဖြစ်စေပါတယ်။ မှောက်အိပ်မယ်ဆိုရင် အကြာကြီးမအိပ်သင့်ပါဘူး။ သင်ဟာ မှောက်အိပ်မယ်ဆို ရင် အချိန်ခဏလောက်သာ အိပ်သင့်ပါတယ်။ အဲဒီလို အိပ်တဲ့ အခါမှာလည်း ပိုပြီးတော့ သက်သောင့်သက်သာဖြစ်စေဖို့အတွက် ရင်ဘတ်(သို့) ဝမ်းဗိုက်အောက်မှာ ခေါင်းအုံးတစ်လုံးခံပြီးအိပ်သင့်ပါတယ်။

 ၃။ ခန္ဓာကိုယ်တစ်ဝက်ထိုင်တစ်ဝက်လှဲလျောင်းတဲ့ပုံစံအိပ်စက်ခြင်း

ရိုးရိုးလေးပဲ တွေးကြည့်ပါ။ သင့်အနေနဲ့ ခန္ဓာကိုယ်တစ်ဝက်ကိုထိုင်ပြီး တစ်ဝက်ကို လှဲလျောင်းကာ သင့်ရဲ့အောက်ပိုင်းဟာ အိပ်ယာ(သို့) ဆိုဖာပေါ်မှာ ရှိနေလျက် ခါးအောက်ပိုင်းမှာ ခေါင်းတစ်လုံး  ခံထားမယ်။ ပြီးရင် ဖုန်းသုံးနေ မယ်(သို့) စာအုပ်ဖတ်နေမယ်(သို့) TV ကြည့်နေမယ်ဆိုပါစို့။ ဒါဟာ သင့်ရဲ့လည်ပင်းကို အချိန်များစွာကြာအောင် ကွေးညွတ်ထားရတဲ့ အနေအထား ဖြစ်ပါတယ်။  ဒီလိုပုံစံအနေအထားနဲ့ ကြာရှည်စွာထိုင်မယ်ဆိုရင် ကျောရိုးပေါ်မှာ ဖိအားသက်ရောက်မှု မြင့်လာမှာဖြစ်ပြီး ပုခုံးနာကျင်ရောင်ရမ်းမယ့်အပြင် ဒီလို အနေအထားထိုင်ချိန် ကျောရိုးကွေးထား ခြင်းကြောင့် ခါးအောက်ပိုင်း နာကျင်ခြင်း ကို ခံစားရမှာဖြစ်ပါတယ်။

၄။ လက်မောင်းပေါ်ခေါင်းအုံးအိပ်ခြင်း

လက်မောင်းအပေါ်ပိုင်းကို ခေါင်းအုံးထား ခြင်း(သို့) ထိုင်ခုံလက်ရန်းလို မျက်နှာပြင် တစ်ခုပေါ်ကို လက်မောင်းချထားခြင်းကြောင့် လက်ရဲ့ အရေးအကြီးဆုံးအာရုံကြောတစ်ခုဖြစ်တဲ့ ရေဒီယမ်အာရုံကြော (Radial Nerve) တည်ရှိရာ နေရာကို ကြာရှည်စွာဖိအား သက်ရောက်စေပါတယ်။

မှောက်အိပ်ခြင်းကြောင့် အကျိုးဆက် ပြဿနာတစ်ခုကတော့ Wrist Drop လို့ ခေါ်တဲ့ မှောက်အိပ်ထားတဲ့လက်တစ်ဖက်ဟာ အပေါ်ကို မ လို့ မြှောက်လို့ မရတဲ့ အခြေအနေဖြစ်ပါတယ်။ ဒါဟာ ရေဒီယမ်အာရုံကြောပေါ်ကို အချိန်ကြာရှည်စွာ ဖိအားသက်ရောက်ခြင်းရဲ့ နောက်ဆက်တွဲရလဒ်ဖြစ်ပါတယ်။ ဒါကို နောက်တစ်မျိုး အနေနဲ့ Saturday Night Palsy (သို့) Honeymoon Palsy လို့လည်း ခေါ်ပါသေးတယ်။ ဒါပေမယ့် ဒီပြဿနာဟာ စိုးရိမ်ရတဲ့ အခြေအနေမဟုတ်တာ ကြောင့် ကုသမှုမလိုဘဲ သူ့အလိုလို ပြန်သက်သာနိုင်ပါတယ်။ ပြန်သက်သာလာ နိုင်တဲ့ ကြာချိန်ကတော့ တစ်ယောက်နဲ့တစ်ယောက် မတူကြပါ ဘူး။ ပုံမှန်အား ဖြင့် (၃)ပတ်-(၄)ပတ် လောက်ဆို ပျောက်ကင်းသက်သာလာတတ်ပါတယ်။ ပြန်လည်သက်သာလာဖို့အချိန်အတွင်းမှာ လက်ကောက်ဝတ်၊ လက်၊ လက်ဖျံ ကြွက်သား တို့ကို သန်မာစေပြီး ကြွက်သားကြုံလှီခြင်းနဲ့ လက်ကောက်ဝတ် အရိုးအဆစ်များ အလုပ်မလုပ်ခြင်း ကို ကာကွယ်ပေးတဲ့ တချို့လေ့ကျင့်ခန်းများ လုပ်ဆောင်ဖို့ ဆရာဝန်က အကြံပြုမှာဖြစ်ပါတယ်။

အရက်(သို့)ဘီယာ အလွန်အကျွံသောက်သုံးပြီး ဘားကောင်တာစားပွဲပေါ်မှာ လက်မောင်းပေါ် ခေါင်းမှောက်လျက်အိပ်ပျော်သွားတတ်တဲ့သူများ၊ ချစ်သူအသစ် ရတဲ့အချိန် ကိုယ့်လက်မောင်းပေါ်မှာ အိပ်စက် စေပြီး မနက် ရောက်တဲ့အခါ လက်ကိုအပေါ် မ မတင်နိုင်ဘဲ Wrist Drop နဲ့ နိုးထလာတဲ့ လူများကို အစွဲပြုပြီး Saturday Night Palsy / Honeymoon Palsy ဆိုတဲ့ အခေါ်အဝေါ်များ ပေါ်ပေါက်လာတာဖြစ်ပါတယ်။

အထက်မှာဖော်ပြခဲ့ပြီးဖြစ်တဲ့ မသင့်လျော်တဲ့ အိပ်စက်မှုပုံစံများကြောင့် ဖြစ်လာမယ့် ပြဿနာများကိုရှောင်ရှားဖို့ အောက်ပါအချက်များကို အကြံပြုလို ပါတယ်။

၁ ။ ပက်လက်လှန်အိပ်ခြင်းဟာ က်ိုယ့်ရဲ့ခန္ဓာကိုယ်အလေးချိန်ကို နောက်ကျော ဘက် ကျယ်ပြန့်တဲ့နေရာတစ်ခုလုံးဆီ ညီမျှစွာ သက်ရောက်ဖို့ အထောက်အကူ ပြုပါတယ်။ ဆိုလိုတာက တစ်နေရာတည်းမှာ တခြားတစ်နေရာထက် ပိုပြီး ဖိအားသက်ရောက်တာမျိုး မရှိတော့ပါဘူး။ ပက်လက်အနေအထားအိပ်စက်ခြင်း ဟာ ကျောရိုးကိုတစ်ဖြောင့်တည်းဖြစ်စေပြီး ပုံမှန်မဟုတ်တဲ့ ကွေးညွတ်မှု ရှိတော့မှာ မဟုတ်ပါဘူး။ ဒါ့အပြင် ခေါင်းအုံးတစ်လုံးကို ဒူးအောက်မှာထားမယ် ဆိုရင် ပိုပြီး သက်သောင့်သက်သာဖြစ်စေမှာပါ။ ခေါင်းအုံးဟာ တင်ပါးနေရာမှာ လိမ်စောင်းသွားနိုင်မှုကို လျှော့ချပေးတဲ့အပြင် ခါးအောက်ပိုင်း ကွေးညွတ်မှုနဲ့ ခါးနာခြင်းကိုလည်း ကာကွယ်ပေးနိုင်ပါတယ်။ ဒါပေမယ့် နှလုံးရောဂါ၊ အဆုတ် ရောဂါ၊ နာတာရှည်ခါးနာခြင်း၊ အိပ်ပျော်နေစဉ်ဟောက်ခြင်းနဲ့ ပတ်သက်တဲ့ ပြဿနာ၊ အိပ်ပျော်နေစဉ်အသက်ရှူရပ်ခြင်း စတဲ့ ရောဂါပြဿနာရှိသူများ အနေနဲ့ ပက်လက်လှန်အိပ်ဖို့ မသင့်တော်ပါဘူး။

၂ ။ ဘေးတစောင်းအိပ်ခြင်းဟာ သက်သောင့်သက်သာရှိတာကြောင့် မှန်ကန်တဲ့ နောက်ထပ်နည်းလမ်းတစ်ခုဖြစ်ပြီး ခါးနာခြင်းကို လျှော့ချပေးနိုင်ပါတယ်။ အိပ်စက်တဲ့အခါမှာ ဖက်ခေါင်းအုံးတစ်လုံးကို ဖက်အိပ်ဖို့လည်း အကြံပြုချင်ပါ တယ်။ ကိုယ့်ရဲ့ခေါင်းအုံး ဟာလည်း ခေါင်းကို အရမ်းကြီးနိမ့်မကျနေအောင် အထောက် အကူပြုမှာဖြစ်ပါတယ်။ ဘေးတစောင်းအိပ်နေစဉ် ခေါင်း တအား နိမ့်ကျနေတယ်ဆိုရင် လည်ပင်းနာတတ်ပါတယ်။ တကယ်တော့ ဘေးတစောင်း အိပ်နေချိန်မှာ ခေါင်းအုံးဟာ ခေါင်းအောက်ပိုင်းကနေ ကျောရိုးအထိ ထိန်းပေး ထားတာမျိုးဖြစ်သင့်ပါတယ်။  ဒါ့အပြင် လည်ပင်းရဲ့ အနိမ့်အမြင့်ဟာလည်း ခါးနဲ့ တင်ပါး တို့ကို ထိန်းပေးထားရမှာဖြစ်ပါတယ်။

၃ ။ အရေးကြီးတာတစ်ချက်ရှိပါသေးတယ်။ သင်ဟာ တစ်ခုခု သက်သောင့် သက်သာမဖြစ်တဲ့အချိန်မှာ သင်အဆင်ပြေတဲ့ အိပ်စက်မှုပုံစံကို ပြောင်းလဲနိုင် ပါတယ်။ ဒါဆိုရင် နံရိုးနဲ့ ကြွက်သားများအပေါ် တောက်လျှောက်ကျရောက်နေတဲ့ ဖိအားကို လျော့နည်းစေမှာဖြစ်ပါတယ်။

၄ ။ အိပ်ယာဟာလည်း အရေးကြီးတဲ့အချက်တစ်ချက်အဖြစ် ရှိနေပါတယ်။ ဘာလို့လဲဆိုတော့ လူတစ်ယောက်ချင်းစီရဲ့ ဦးခေါင်းပုံစံအပေါ်မူတည်ပြီး သင့်လျော်မှု ရှိ မရှိ ဆိုတာ ကွဲပြားသွားနိုင်လို့ ဖြစ်ပါတယ်။ သက်သောင့် သက်သာဖြစ်စေတဲ့ အိပ်ယာတစ်ခုကို ရွေးချယ်ရာမှာ သင့်လျော်သော အမြင့်ရှိတဲ့ခေါင်းအုံး၊ နောက်ကျော ကို သင့်လျော်သောပမာဏထိ ပံ့ပိုးပေးနိုင်တဲ့ မွေ့ယာ၊ ဘေးတစောင်းအိပ်နေစဉ် ဖက်ထားနိုင်တဲ့ဖက်ခေါင်းအုံး စတဲ့အချက် တွေအပေါ်မူတည်ပြီး ရွေးချယ်သင့်ပါတယ်။

၅ ။ အိပ်ယာအတွက် သင့်လျော်တဲ့ပတ်ဝန်းကျင်ဆိုတာကတော့ အလင်း မရှိဘဲ မှောင်မဲနေတဲ့ အိပ်ခန်း (သို့) ဆူညံသံမရှိခြင်းကို ဆိုလိုတာဖြစ်ပါ တယ်။ ဒီအခြေအနေမဖြစ်နိုင်ဘူးဆိုရင် နှစ်နှစ်ခြိုက်ခြိုက်အိပ်ပျော်အောင် ကူညီပေးတဲ့ Sleep Masks ၊ Ear Plugs စတဲ့ ကိရိယာများကို အသုံးပြုသင့် ပါတယ်။ ဒါတွေဟာ သင့်ကို ညဘက်မှာ ကောင်းစွာအိပ်ပျော်စေမှာဖြစ်ပြီး ခန္ဓာကိုယ်အတွက် သင့်လျော်တဲ့ အနားယူမှုကို ရရှိစေမှာဖြစ်ပါတယ်။

အိပ်စက်မှုပုံစံကိုပြောင်းလဲခြင်း၊ တစ်ကိုယ်ရေသန့်ရှင်းမှုကိုအလေ့အကျင့် လုပ်ခြင်း၊ အိပ်ယာကိုသေချာစွာရွေးချယ်ခြင်း၊ သင့်လျော်တဲ့ အိပ်ခန်းဝန်းကျင် တစ်ခုကို ဖန်တီးခြင်း များအပါအဝင် ကိုယ့်ရဲ့ အိပ်စက်ခြင်း အလေ့အထ တချို့ကို တဖြေးဖြေးပြောင်းလည်းခြင်းဟာ သင့်ရဲ့ အိပ်စက်ချိန်ကို ပိုမိုကောင်းမွန်အောင် လုပ်ဆောင်ပေးသလို သင့်လျော်တဲ့ အနားယူမှုကိုလည်း ဖြစ်စေမှာပါ။ ဒါ့အပြင် သင့်ရဲ့ နံရိုး၊ ကြွက်သား၊ အာရုံကြောများကိုလည်း စောင့်ရှောက်ပြီးသားဖြစ်စေမှာ ပါ။ အထက်မှာဖော်ပြခဲ့တဲ့ အိပ်စက်မှုနည်းလမ်းများအားလုံးဟာ သင့်ကို လန်းဆန်းတက်ကြွစွာ နိုးထစေပြီး နေ့စဉ်လုပ်ငန်းဆောင်တာများလုပ်ဆောင်ဖို့ အဆင်သင့် ဖြစ်စေတဲ့အပြင် ကြွက်သား၊ အရေပြားနဲ့ အာရုံကြောစနစ် ကို ကျန်းမာသန်စွမ်းစေကာ သက်တမ်းရှည်ကြာစွာ နေထိုင်စေနိုင်မှာပဲဖြစ်ပါတယ်။