မိန်းမကိုယ်အရည်ဆင်းခြင်းရဲ့အရောင်များကပြောပြနေတဲ့ အမျိုးသမီးတို့ကျန်းမာရေး

• မိန်းမကိုယ် ကနေ အရည်ကြည်အနည်းငယ်မျှဆင်းခြင်းဟာ မိန်းမကိုယ် ကို ချောမွေ့နေစေဖို့ အထောက်အကူပြုပါတယ်။ ဒါဟာ ဓမ္မတာစက်ဝန်းရဲ့ သားဥကြွေစဉ်အတွင်း အရည်ကြည်ဆင်းလေ့ရှိပြီး ပြန်ပျောက်သွားကာ ဓမ္မတာလာလာခါနီးမှာ  ပြန်ဆင်းလေ့ရှိပါတယ်။
• ပုံမှန် မိန်းမကိုယ်ကဆင်းတဲ့ အရည်များဟာ အနံ့တစ်ခုရှိပါတယ်။ ဒါပေမယ့် အနံ့ဆိုးမဖြစ်သင့်သလို ယားယံခြင်း၊ ဗိုက်အောင့်ခြင်း ၊ ဖျားနာခြင်း ၊ ဆီးသွားနေစဥ် နာကျဉ်တာမျိုးလည်း မဖြစ်ရပါဘူး။
• မိန်းမကိုယ်မှ ဆင်းတဲ့အရည်များရဲ့ အရောင် ၊ အနံ့ ၊ ပုံစံကို သေချာ ဂရုတစိုက် စောင့်ကြည့်ခြင်းဟာ ဖြစ်လာနိုင်တဲ့ ကျန်းမာရေးပြဿနာများကို အမြန်ဆုံး အတည်ပြုနိုင်ဖို့ ကူညီပေးပါတယ်။  တကယ်လို့ ဆိုးရွားတဲ့ ရောဂါ ဆိုရင်လည်း ကုသမှုကိုသေချာဆောင်ရွက်နိုင်မှာဖြစ်ပါတယ်။ တကယ်လို့ ပုံမှန်ဆင်းနေကျ အရည်နဲ့မတူဘဲ ပြောင်းလဲသွားတာကို ဘာဖြစ်မှန်းမသိဘူးဆိုရင်လည်း ဆရာဝန်နဲ့ တိုင်ပင်ပြီး လိုအပ်ရင် ကုသမှုကို ခံယူသင့်ပါတယ်။

မိန်းမကိုယ်ကဆင်းတဲ့အရည် (သို့)  ကြည်လင်တဲ့အရိအချွဲ (သို့) ဖြူပျစ်ပျစ်အရိအချွဲ များ မိန်းမကိုယ်ကနေထွက်လာခြင်းကို ဆိုလိုတာဖြစ်ပြီး တစ်ခါ တစ်ရံမှာ အမျိုးသမီးတို့ရဲ့  အတွင်းအကျဆုံး Private Area မှာ ကျိန်းစပ်ခြင်းနဲ့ မခံမရပ် နိုင်တဲ့ ခံစားမှုကို ဖြစ်စေပါတယ်။ မိန်းမကိုယ်မှ အရည်ဆင်းခြင်းဟာ ဓမ္မတာစက်ဝန်း ရဲ့ သားဥကြွေတဲ့အချိန်အတွင်းမှာဖြစ်လေ့ရှိပြီး ပြန်ပျောက်သွားကာ နောက်တစ်ကြိမ် ဓမ္မတာ လာခါနီးမှ ပြန်လည်ဖြစ်ပေါ်ပါတယ်။

မိန်းမကိုယ်ကနေ အရည်ဆင်းခြင်းဟာ အမျိုးသမီးများအားလုံးအတွက် ပုံမှန် ဖြစ်ရိုးဖြစ်စဥ်တစ်ခုပဲဖြစ်ပါတယ်။ ပုံမှန်အားဖြင့် အရိအချွဲနဲ့တူတဲ့ အရည်ကြည်အဖြစ် အနည်းငယ်မျှဆင်းပြီး မိန်းမကိုယ်ကို စိုစွတ်ချောမွေ့စေပါတယ်။ ဒီအရည်မှာ သူ့ရဲ့ အနံ့တစ်မျိုးရှိတယ်ဆိုပေမယ့် အရမ်းကြီးဆိုးရွားမနေပါဘူး။ ယားယံခြင်းလည်း ဖြစ်မနေသင့်သလို ဖျားနာခြင်း ၊ နာကျင်တဲ့ခံစားမှုအပါအဝင် တခြားသော လက္ခဏာများ လည်းရှိမနေသင့်ပါဘူး။ ဒါကြောင့်မိန်းမကိုယ်က ဆင်းတဲ့အရည်မှာ ပုပ်အက်အက်အနံ့နံခြင်း ၊ အရည်မဟုတ်ဘဲ အခဲများဆင်းခြင်း ၊  သွေးပါခြင်း ၊ စိမ်းပုပ်ရောင်ဖြစ်ခြင်း ၊ ပုံမှန်ထက်ပမာဏ ပိုဆင်းခြင်း ၊ မိန်းမကိုယ် ယားယံပြီးနာကျင်ခြင်း ၊ လိင်ဆက်ဆံစဉ်ဖျားနာခြင်း / နာကျင်ခြင်း အပါအဝင် အနံ့ ၊ ပုံစံ ၊ အရောင် တစ်ခုခု အပြောင်းအလဲဖြစ်တာကို သတိထားမိတယ်ဆိုရင် ကျန်းမာရေးပြဿနာတစ်ခုခုရှိနေတယ်လို့ သတ်မှတ်နိုင်ပါ တယ်။ ဒီလိုအခြေအနေမျိုးကြုံလာရတဲ့အခါမှာ အသေးအမွှားပဲဆိုပြီးသတ်မှတ်လိုက် ခြင်း (သို့) ကြုံရတဲ့ပြဿနာကိုထုတ်ပြောဖို့ရှက်နေခြင်းစတာတွေကြောင့် ပေါ့ပေါ့တန်တန် သဘောထားပြီး မကုသဘဲနေလိုက်မယ်ဆိုရင် ပိုမိုဆိုးရွားတဲ့ရောဂါပြဿနာတွေ ဖြစ်လာနိုင်ပါတယ်။

 မိန်းမကိုယ်ကဆင်းတဲ့အရည်ရဲ့ အရောင်များကညွှန်ပြနေတဲ့ ကျန်းမာရေးပြဿနာများ

မိန်းမကိုယ်ကဆင်းတဲ့အရည်များရဲ့အရောင်များအပေါ်မူတည်ပြီးအောက်ဖော်ပြပါ ကျန်းမာရေးပြဿနာတွေကို ညွှန်းဆိုနေပါတယ်။

• ဝါဖျော့ဖျော့အရောင်အရည်ဆင်းခြင်း - မိန်းမကိုယ်ကနေ နို့ချဉ်ကဲ့သို့ အရောင် ရှိပြီး ပုံမှန်ညှီနံ့နဲ့မတူဘဲ စူးရှရှအနံ့ရှိတဲ့ အရည်များဆင်းခြင်းဟာ အနည်းငယ်ယားယံခြင်းနဲ့ နာကျင်မှုကိုခံစားရစေပါတယ်။ ဒီလိုအမျိုးအစား အရည်များဆင်းခြင်းကို အချိန်အတော်ကြာပိုးသတ်ဆေးစွဲသောက်ခဲ့သူများ (သို့) ကိုယ်ခံအားနည်းတဲ့သူများမှာ ကြုံတွေ့ရနိုင်ပါတယ်။
• အဝါရောင်အရည်ဆင်းခြင်း - အဝါရောင်အရည်ဆင်းခြင်းဟာ အကြောင်းအရင်း အမျိုးမျိုးကြောင့် ဖြစ်နိုင်ပါတယ်။ အနံ့စူးရှတဲ့ အဝါရောင်အရည်များဆင်းခြင်း ဟာ ဗိုင်းရပ်စ်ပိုးကူးစက်မှုခံရခြင်းကြောင့်ဖြစ်နိုင်ပါတယ်။ တကယ်လို့ အဝါရောင် အရည်ဆင်းပြီး ညှီနံ့ရှိတယ် ယားယံတယ်ဆိုရင်တော့ ဒါဟာ ဘတ်တီးရီးယားပိုး ကူးစက်ခံရခြင်းကြောင့်ဖြစ်နိုင်ပါတယ်။ ဒါ့အပြင် လိင်ကနေတစ်ဆင့်ရောဂါပိုး ကူးစက်ခြင်း (Gonorrheal Infection) ခံရတယ်ဆိုရင် အဝါရောင်အရည် အများကြီးဆင်းခြင်း ၊ တစ်မူထူးခြားတဲ့အနံ့ရှိတဲ့ အစိမ်းရောင်အရည်များဆင်း ခြင်း စတာတွေကို ကြုံတွေ့ရနိုင်ပြီး ယားယံခြင်းကိုခံစားရနိုင်သလို တစ်ဆက်တည်းမှာ နာကျင်ခြင်းကိုလည်းခံစားရနိုင်ပါတယ်။
• အစိမ်းရောင်အရည်များဆင်းခြင်း - အစိမ်းရောင်အရည်ဆင်းခြင်းဟာ လိင်ကနေ တစ်ဆင့်ကူးစက်တဲ့ ရောဂါပိုးမွှားများကြောင့်ဖြစ်ပါတယ်။ ဒီလိုအမျိုးအစားအရည် ဟာ ပုံမှန်အားဖြင့် အမြှုပ်ပုံစံဆင်းပြီး အနံ့အားဖြင့် ချဉ်စူးစူးရှိကာ မိန်းမကိုယ်တစ်ဝိုက် နီရဲယားယံတဲ့ အဖုအပိန့်များကို ဖြစ်စေပါတယ်။ တကယ်လို့ အစိမ်းရောင်အရည်ဆင်းသည့်တိုင်အောင် ယားယံ မှုနဲ့ စူးရှရှ အနံ့မရှိဘူးဆိုရင် အန္တရာယ်မဖြစ်စေတဲ့ ဘတ်တီးရီးယားများ ရှိနေခြင်း ကြောင့်ဖြစ်ပါတယ်။
• မီးခိုးရောင်အရည်များဆင်းခြင်း - မိန်းမကိုယ်အတွင်းမှာရှိတဲ့ ကောင်းကျိုးပြုတဲ့ ဘတ်တီးရီးယားတွေ လျော့နည်းသွားမယ်ဆိုရင် ရောဂါဖြစ်စေနိုင်တဲ့ ဘတ်တီးရီးယားတွေ များပြားလာစေပြီး မိန်းမကိုယ်ရောင်ရမ်းခြင်း ဖြစ်စေနိုင်ပါ တယ်။ ဒီလိုအခြေအနေမှာ မိန်းမကိုယ်က ဆင်းတဲ့အရည်ဟာမီးခိုးရောင် ဖျော့ဖျော့ ရှိပြီး အထူးအားဖြင့်လိင်ဆက်ဆံပြီးချိန် (သို့)  ရာသီစက်ဝန်း ကနဦး ကာလအတွင်းမှာ ညှီစို့စို့ အနံ့ကို ဖြစ်စေပါတယ်။ ဒါ့အပြင် ပိုးသတ်ဆေးများ ကို အချိန်ကြာရှည်စွာ စွဲ သောက်ခြင်း ၊ မိန်းမကိုယ်အတွင်းကို ကြမ်းကြမ်းတမ်းတမ်း နှိုက်ပြီးဆေးကြောခြင်း စတာတွေဟာ အန္တရာယ်ရှိတဲ့ ဘတ်တီးရီးယားများ ကြီးထွားမှုကို တိုက်ဖျက်ပေးတဲ့ ကောင်းကျိုးပြုဘတ်တီးရီးယားများကို လျော့နည်း စေပါတယ်။ ဒါပေမယ့် လိင်ကနေတစ်ဆင့်ကူးစက်တတ်တဲ့ ရောဂါ များကြောင့်လည်း မီးခိုးရောင်အရည်များ ဆင်းနိုင်ပါတယ်။
• အညိုရောင်အရည်များဆင်းခြင်း - မိန်းမကိုယ် ကနေ အညိုရောင်အရည် အနည်းငယ်ဆင်းခြင်းဟာ ဓမ္မတာလာချိန် သွေးပါခြင်းကြောင့်ဖြစ့်ပြီး အန္တရာယ် မရှိပါဘူး။ ဒါပေမယ့် သွေးဆင်းတဲ့အခါ ပုံမှန်မဟုတ်ဘဲ စူးရှရှ အနံ့တွေပါ ပါလာပြီဆိုရင် မိန်းမကိုယ်ပိုးဝင်ခြင်း (သို့)  သားအိမ်ခေါင်းဆဲလ်မှာ မူမမှန်မှု ရှိနေခြင်း ကြောင့်ဖြစ်နိုင်ပါတယ်။ အထက်မှာဖော်ပြခဲ့တဲ့ လက္ခဏာတွေနဲ့ အတူ အနည်းငယ်ဗိုက်အောင့်ခြင်းကိုပါ ပူးတွဲပြီးခံစားရမယ်ဆိုရင် သန္ဓေသားထည့်သွင်း မှုကနေ သွေးထွက်ခြင်း (သို့)  သန္ဓေသားနေရာလွဲမှားခြင်း ကြောင့် ဖြစ်နိုင်ပါတယ်။
• ပန်းရောင်အရည်ဆင်းခြင်း - မိန်းမကိုယ်ကနေ ပန်းရောင်ဖျော့ဖျော့ အရည်များ ဆင်းခြင်းဟာ သားအိမ်အတွင်းလွှာတစ်ရှူးကွာကျမှုကြောင့် ဖြစ်ပါတယ်။ ဒါဟာ ကလေးမွေးပြီးနောက် ဖြစ်လေ့ရှိပြီး Lochia ခေါ် ကလေးမွေးပြီးနောက် မိန်းမကိုယ်ကနေထွက်တဲ့ အရာတစ်ခုကြောင့်လည်း ဖြစ်နိုင်ပါတယ်။

မိန်းမကိုယ်ကနေအရည်ဆင်းခြင်းနဲ့ပတ်သက်ပြီးဘယ်အချိန်မှာဆရာဝန်နဲ့ ပြသတိုင်ပင်ရမလဲ?

မိန်းမကိုယ်ကနေအရည်ဆင်းခြင်း်ဟာ အမျိုးသမီးများ မျိုးပွားနိုင်တဲ့ အသက်အရွယ်တစ်ခုရောက်ရင် မလွဲမသွေကြုံတွေ့ရမယ့် ဖြစ်စဉ်တစ်ခုဖြစ်ပါတယ်။ ဒါကြောင့် မိန်းမကိုယ်ကနေဆင်းတဲ့အရည်များရဲ့ အရောင် ၊ အနံ့ ၊ ပုံစံ စတာတွေရဲ့ ပြောင်းလဲမှုကို ကောင်းစွာနားလည်ပြီး ဂရုတစိုက်စောင့်ကြည့်ခြင်းဟာ ကျန်းမာရေး ပြဿနာတွေကို အတည်ပြုသတ်မှတ်ပေးနိုင်သလို ပြင်းထန်တဲ့ရောဂါအခြေအနေ တစ်ခုခု ဖြစ်ပွားတဲ့အချိန်မှာ ကုသမှုနည်းလမ်းကို ချက်ချင်းဆုံးဖြတ် ပေးနိုင်မှာပါ။

အမျိုးသမီးတို့ရဲ့ သဘာဝအလျောက်ဖြစ်တဲ့ အတွင်းရေးကိစ္စကို ပေါ့ပေါ့တန်တန် သဘောထားပြီး ဂရုမစိုက်ဘဲနေမယ် (သို့) အကူအညီယူရမှာကို ရှက်နေမယ်ဆိုရင် ကျန်းမာရေးပြဿနာတစ်ခုကို လျစ်လျူရှုလိုက်သလိုပါပဲ။ တစ်ခါတစ်ရံမှာ ဒီလို ပြဿနာတွေဟာ သာမန်အသေးအမွှားကိစ္စတစ်ခုအဖြစ်သာ စတင်ဖြစ်ပေါ်ပါတယ်။ ဒါပေမယ့် အလျှင်အမြန်အတွင်းမှာပဲ ရှုပ်ထွေးပြီး ရေရှည်ကုသရမယ့် ပြဿနာများ အဖြစ် ကြီးထွားသွားပါတယ်။ ဒါကြောင့် အမျိုးသမီးများအနေနဲ့ အရည်ဆင်းခြင်း ပြဿနာနဲ့ပတ်သက်ပြီး မသေချာဘူးဆိုရင် လိုအပ်တဲ့ ကုသမှုနဲ့ အကြံဉာဏ်များရယူဖို့ ဆရာဝန်နဲ့ ဆွေးနွေးပြသတိုင်ပင်ဖို့ အရေးကြီးကြောင်း ဒီဆောင်းပါးကနေတစ်ဆင့် အကြံပြုအပ်ပါတယ်။