ဆံပင်ကျွတ်ခြင်း - အကြောင်းရင်းများ နှင့် ထိရောက်သောကုသမှုများ

• ဆံပင်ဟာ လူတစ်ယောက်ရဲ့ အသက်(၃၀)မှာ သူ့ရဲ့ အမြင့်မားဆုံး သိပ်သည်းဆ နဲ့ အထူ ကို ရောက်ရှိပါတယ်။ အဲဒီနောက်မှာ အသက်အရွယ်ကြီးလာတာနဲ့အမျှ သိပ်သည်းစနဲ့ ဆံချည်မျှင်များဟာ စတင်လျော့ပါးလာပါတယ်။

• ခေါင်းဖီးတဲ့အခါ ဘီးမှာဆံပင်များကပ်ငြိခြင်း ၊ ဆံပင်ပါးလာခြင်း ၊ ထိပ်ကွက်ခြင်း ၊ ခေါင်းလျှော်ပြီးနောက် ရေစစ်တဲ့အခါဆံပင်ကျွတ်ခြင်းစမ်းသပ်ခြင်း စတဲ့ နည်းလမ်းများနဲ့ ဆံပင်ကျွတ်ခြင်းကို သတိထားမိနိုင်ပါတယ်။

• ဆံပင်ကျွတ်ခြင်းကိုအများဆုံးဖြစ်စေတဲ့ အကြောင်းအရင်းများကတော့ အသက်ကြီးလာခြင်း ၊ မိသားစုမှာဆံပင်ပါးတဲ့ရာဇဝင်ရှိခြင်း စတာတွေပဲဖြစ်ပါတယ်။

   

• လူတစ်ယောက်ဟာတစ်နေ့ကို ဆံပင် အပင်(၅၀) ကနေ (၁၀၀) လောက် ကျွတ်လေ့ရှိပါတယ်။ ဒါပေမယ့်လည်း လူတစ်ယောက်ရဲ့ခေါင်းမှာ ဆံပင် အပင်(၁၀၀,၀၀၀) လောက်ရှိတာကြောင့် ဆံပင်နည်းနည်းပါးပါးကျွတ်တာကို သတိမထားမိကြပါဘူး။ ဒါပေမယ့် ကျွတ်သွားတဲ့ဆံပင်တွေနေရာမှာ သဘာဝအတိုင်း ဆံပင်သစ်ပြန်ပေါက်လာပါတယ်။
• ဆံပင်ဟာ အသက်(၃၀)မတိုင်ခင်မှာ သူ့ရဲ့ အထူဆုံးနဲ့ အပြည့်ဝဆုံးအခြေအနေကို ရောက်ရှိပါတယ်။ အဲဒီနောက် အသက်ကြီးလာတာနဲ့အမျှ Hair Cycle ဟာ ပိုမို တိုတောင်းလာပြီး မကြာခဏ ဆံပင်ပါးခြင်း ၊ ဆံပင်ကျွတ်ခြင်း တို့ကိုကြုံတွေ့ရနိုင်ပါ တယ်။  နောက်ဆုံးမှာတော့ ဆံပင်ပေါက်ခြင်းဖြစ်စဉ်စက်ဝန်း (Hair Growth Cycle) ဟာ အဆုံးသတ်သွားကာ ဆံပင်သစ် ထပ်မထွက်လာတော့ဘဲ သိသိသာသာပါးခြင်း (သို့) ထိပ်ပြောင်ခြင်း ကိုဖြစ်စေပါတယ်။
• ဆံပင်ကျွတ်ခြင်းဟာ ဖြည်းဖြည်းချင်း (သို့) ရုတ်တရက်ဖြစ်နိုင်သလို ယာယီ(သို့) အမြဲတမ်းလည်းဖြစ်နိုင်ပါတယ်။ ဆံပင်ကျွတ်ခြင်းဟာ သက်ကြီးပိုင်းတွေမှာ အဖြစ်များတယ်ဆိုပေမယ့်လည်း အလွန်အကျွံဆံပင်ကျွတ်ခြင်းဟာ ငယ်ရွယ်တဲ့သူတွေမှာလည်း ဖြစ်နိုင်ပါတယ်။

ဆံပင်ကျွတ်ခြင်းလို့ဆိုရာမှာ ဦးရေပြားက ဆံပင်ကျွတ်တာကိုခေါ်တာဖြစ်သလို ခန္ဓာကိုယ်ရဲ့ တခြားအစိတ်အပိုင်းက အမွှေးအမျှင်တွေကျွတ်တာကိုလည်း ဆိုလိုပါတယ်။ ခေါင်းလျှော်တဲ့အခါ ဆံပင်များပါလာခြင်း ၊ ဘီးမှာဆံထွေးများကပ်ငြိခြင်း ၊ ဆံပင်ပါးလာခြင်း ၊ ထိပ်ကွက်ခြင်း စတာတွေဟာ ပုံမှန်မဟုတ်ဘဲ အလွန်အကျွံဆံပင်ကျွတ်ခြင်းကို ညွှန်ပြနေပါတယ်။ ဒါကြောင့်ဆံပင်ကျွတ်ပြီဆိုရင် တိကျတဲ့အကြောင်းအရင်းကိုရှာဖွေဖို့နဲ့ သင့်လျော်တဲ့ ကုသမှုတွေ လုပ်ဆောင်ဖို့ ဆရာဝန်နဲ့သေချာတိုင်ပင်ဆွေးနွေးသင့်ပါတယ်။

• မျိုးရိုးဗီဇ - ဆံပင်ကျွတ်ခြင်းရဲ့ အဓိက အကြောင်းအရင်းကတော့ မိသားစုထဲမှာ ထိပ်ပြောင်တဲ့သူရှိခြင်းကြောင့်ဖြစ်ပါတယ်။ လေ့လာမှုများအရ မျိုးရိုးဗီဇအပြင် ပတ်ဝန်းကျင်ဆိုင်ရာသက်ရောက်မှုများဖြစ်တဲ့  စိတ်ဖိစီးမှုနဲ့လေထုညစ်ညမ်းခြင်း စတာတွေဟာလည်း ဆံပင်ပါးခြင်း / ဆံပင်ကျွတ်ခြင်းကိုဖြစ်စေပါတယ်။  ဒီအကြောင်းအရာများဟာ Androgen လို့ခေါ်တဲ့ အမျိုးသားဟော်မုန်းနဲ့ဆက်စပ်နေပြီး ဆံပင်ပေါက်ခြင်းဖြစ်စဉ် (Hair Growth Cycle) မှာ အဓိကကျပါတယ်။
• ဖျားနာခြင်း ၊ ခွဲစိတ်ကုသမှု ၊ စိတ်ဖိစီးမှု ၊  စိတ်ဒဏ်ရာ - ဒီလိုမျိုး အကြောင်းအရာ တွေဟာလည်း ယာယီအချိန်ကာလအတွင်းဆံပင်ကျွတ်ခြင်းကိုဖြစ်စေပြီး အများအားဖြင့် ဘာကုသမှုမှမလိုဘဲ သူ့အလိုလို ပြန်ပေါက်ပါတယ်။
• ဟော်မုန်းပြောင်းလဲခြင်း - ဟော်မုန်းပြောင်းလဲခြင်းကြောင့် ယာယီဆံပင်ကျွတ်ခြင်း ဖြစ်နိုင်ပြီးအထူးသဖြင့် ကိုယ်ဝန်ဆောင်စဉ် ၊ ကလေးမွေးချိန် ၊ ကိုယ်ဝန်တားဆေးရပ်တန့်ချိန် ၊ ဓမ္မတာဆုံးချိန် စတဲ့အချိန်တွေမှာ ဖြစ်ပွားနိုင်ပါတယ်။
• ရောဂါအခံရှိခြင်း - သိုင်းရွိုက်ရောဂါ ၊ ဦးရေပြားမှာဖြစ်သောအရေပြားရောဂါ (Lichen Planus) ၊ နာတာရှည်အရေပြေားရောဂါပုံစံ (Lupus) ကဲ့သို့ ဦးရေပြားရောဂါပိုးများဟာလည်း အမာရွတ်ကြောင့်ဆံပင်ကျွတ်ခြင်းဖြစ်ပေါ်နိုင်ပါတယ်။
• သောက်ဆေးများကြောင့်ဖြစ်တဲ့ဘေးထွက်ဆိုးကျိုး - ကင်ဆာရောဂါ ၊ သွေးတိုးရောဂါ ၊ အဆစ်ရောင်ရောဂါ ၊ စိတ်ကျရောဂါ စတာတွေအတွက်သောက်တဲ့ ဆေးများကြောင့် ဆံပင်ကျွတ်နိုင်ပါတယ်။
• ရုတ်တရက်ကိုယ်အလေးချိန်ကျဆင်းခြင်း - အချိန်တိုအတွင်း ရုတ်တရက်ကိုယ်အလေးချိန် ကျဆင်းခြင်းကြောင့်လည်း ဆံပင်ကျွတ်နိုင်ပါတယ်။
• အ‌ဖျားကြီးခြင်း - အဖျားတက်ခြင်းကြောင့် ဆံပင်ကျွတ်ခြင်းဖြစ်နိုင်ပါတယ်။
• အာဟာရချို့တဲ့မှု - ပရိုတိန်း ၊ သံဓာတ်နဲ့ တခြားသော အာဟာရများကဲ့သို့ မရှိမဖြစ်လိုအပ်တဲ့ အာဟာရများ မရှိခြင်းကြောင့်လည်း ဆံပင်ပါးခြင်းကိုဖြစ်စေပါတယ်။

• သောက်ဆေးများ - ဆံပင်ကျွတ်ခြင်းကိုစတင်ကုသရာမှာ သောက်ဆေး ၊ လိမ်းဆေး နှစ်မျိုးစလုံးနဲ့ကုသနိုင်ပါတယ်။ ဒီဆေးတွေကနေ ဖြစ်လာနိုင်တဲ့ ဘေးထွက်ဆိုးကျိုးများ ဟာ သေချာဂရုစိုက်ဖို့လိုတာကြောင့် ဆရာဝန်ရဲ့ ညွှန်ကြားချက်အတိုင်း လိုက်နာဖို့ လိုပါတယ်။
• ကုသမှုများ - လက်ရှိမှာ ဆံပင်သစ်ပြန်ပေါက်ဖို့နဲ့ ရှိပြီးသားဆံသားကိုထိန်းသိမ်းဖို့ ကုသမှုတွေ ရှိနေပြီဖြစ်ပါတယ်။
• ဟော်မုန်းထိန်းညှိခြင်း - ဟော်မုန်းမညီမျှမှုကြောင့်ဖြစ်တဲ့ ဆံပင်ကျွတ်ခြင်းများအတွက် ဟော်မုန်းကုထုံးဟာ မရှိမဖြစ်လိုအပ်ပါတယ်။
• လေဆာကုသမှု - လေဆာကုသမှုဟာ ဆံပင်ပျက်စီးမှုကိုဟန့်တားပြီး ဆံပင်သစ်များပြန်ပေါက်စေဖို့ အထောက်အကူပြုပါတယ်။
• သွေးရည်ကြည်ကုထုံး(PRP) – သွေးရည်ကြည်ထိုးခြင်း (PRP ) ဟာ ဆံသားထဲမှာ ကလာပ်စည်းဖွံ့ဖြိုးမှုဖြစ်စဉ်ကို မြှင့်တင်ပေးပါတယ်။
• ဆံပင်အစားထိုးစိုက်ခြင်း - ဒီနည်းလမ်းကတော့  ဟော်မုန်းသက်ရောက်မှုနည်းတဲ့ ဦးရေပြားနောက်ဖက်က ဆံသားတွေကို ဆံပင်လိုအပ်နေတဲ့နေရာတွေမှာ အစားထိုးထည့်သွင်းတာဖြစ်ပါတယ်။

• ဆံပင်တင်းကျပ်ကျပ်စီးတဲ့ ပုံစံများကိုရှောင်ကျဉ်ပါ။ ဆံပင်ဆွဲခြင်း ၊ လိမ်ခြင်း ၊ ပွတ်ခြင်း စတာတွေ ပြုလုပ်ရတဲ့ဆံပင်ပုံစံတွေကိုရှောင်ကျဉ်ပါ။
• ဆံသားကျန်းမာရေးကိုအထောက်အကူပြုတဲ့ သံဓာတ်နဲ့ ပရိုတိန်းများစွာပါဝင်ပြီး သင့်တင့်မျှတတဲ့စားသောက်မှုပုံစံအတိုင်းစားသောက်ပါ။
• မိမိဦးရေပြားအခြေအနေနဲ့ ကိုက်ညီတဲ့ခေါင်းလျှော်ရည်ကိုရွေးချယ်ပါ။ ဓာတ်မတည့်တဲ့ ၊ ယားယံစေတဲ့ ၊ ဗောက်ထစေတဲ့ ၊ ဦးရေပြားနီရဲစေတဲ့ခေါင်းလျှော်ရည်မျိုးကို မသုံးသင့်ပါ ဘူး။
• ဆံပင်ခြောက်ခံစက် ၊ ဆံပင်ဖြောင့်စက် ၊ ဆိုးဆေး ၊ ချွတ်ဆေးနဲ့ ဆံပင်ကောက်ခြင်းတို့ ဟာ ဆံပင်ကျွတ်စေပါတယ်။
• စိတ်ဖိစီးမှုကို လျှော့ချပါ။ စိတ်ကိုလျှော့ထားပါ။ တကယ်လို့ ဆံပင်ကျွတ်တာကို ကြုံရပြီဆိုရင် အကြောင်းအရင်းအတိအကျနဲ့ ကိုယ်နဲ့သင့်လျော်တဲ့ကုသမှုကိုလုပ်ဆောင်ဖို့ ဆရာဝန်နဲ့ဆွေးနွေးတိုင်ပင်ပါ။

ဆံပင်ကျွတ်ခြင်းဟာ သာမန်ဖြစ်စဉ်သာဖြစ်ပြီး နေ့စဉ်ဖြစ်ပွားနိုင်ပါတယ်။ တစ်ခါတစ်လေမှာလည်း ခဏတာသာ ဖြစ်နိုင်ပါတယ်။ တချို့လူတွေအတွက် ဒါဟာ သဘာဝအရ (သို့) အသက်အရွယ်အရ ဖြစ်လေ့ရှိပြီး ကုသစရာမလိုတဲ့ သာမန်ဖြစ်စဉ်တစ်ခုအဖြစ် လက်ခံထားကြပါတယ်။ ဒါပေမယ့်လည်း တခြားသူများအတွက် ဆံပင်ကျွတ်ခြင်းကြောင့် ယုံကြည်မှုပျောက်ဆုံးရပြီး စိတ်ဖိစီးမှု ၊ စိုးရိမ်မှုတွေ တိုးပွားစေကာနေ့စဉ်ဘဝကို ထိခိုက်စေပါ တယ်။ ဒါကြောင့် ဆံပင်ကျွတ်ရခြင်းအကြောင်းအရင်းကိုသိရဖို့ နဲ့ အထိရောက်ဆုံးနည်းလမ်းနဲ့ ကုသနိုင်ဖို့ ဆရာဝန်နဲ့တိုင်ပင်ဆွေးနွေးရမှာဖြစ်ပါတယ်။