ခွဲမွေးတာနဲ့ ရိုးရိုးမွေးတာဘာကွာသလဲ?

ကမ္ဘာ့ကျန်းမာရေးအဖွဲ့ (WHO) ဟာ ကလေးယူဖို့ မျှော်မှန်းထားတဲ့ မိခင်လောင်းများ ကို သဘာဝအတိုင်းရိုးရိုးမွေးဖို့ အကြံပြုထားပါတယ်။ ဘာလို့လဲဆိုတော့ဒီနည်းလမ်း ဟာ ပြင်းပြင်းထန်ထန်သွေးထွက်မှုမရှိခြင်း၊ ပြန်သက်သာလာဖို့အချိန်နည်းနည်းသာ ယူရခြင်း၊ မိခင်အနေနဲ့ ကိုယ့်ကလေးကိုမွေးမွေးပြီးချင်းမှာပဲစောင့်ရှောက်ခွင့်ရခြင်း၊ ကုန်ကျစရိတ်သက်သာခြင်း စတဲ့အားသာချက်တွေရှိနေလို့ဖြစ်ပါတယ်။ ရိုးရိုးမွေးဖို့ အဆင်မပြေတဲ့ အမျိုးသမီးများအနေနဲ့ကတော့ ခွဲမွေးခြင်း(C-Sections) နည်းလမ်း ကို ရွေးချယ်ရမှာဖြစ်ပါတယ်။ ပျမ်းမျှအားဖြင့် ကလေးယူဖို့မျှော်မှန်းထားတဲ့မိခင်လောင်းများ ရဲ့ (၈၀)-(၈၅) ရာခိုင်နှုန်းဟာ သဘာဝအတိုင်းမွေးဖွားကြပါတယ်။

ခွဲမွေးတာနဲ့နှိုင်းယှဉ်မယ်ဆိုရင် ရိုးရိုးမွေးခြင်းဟာ မွေးနေစဉ်အချိန်မှာ ပိုပြီး နာကျင်မှုကို ခံစားရပါတယ်။ ဒါပေမယ့်လည်း ဒါဟာ ခဏတာမျှပါပဲ။ မွေးဖွားအပြီး ကလေးအပြင်ကို ရောက်ပြီဆိုရင် နာကျင်မှုမရှိတော့ပါဘူး။ ရိုးရိုးမွေးခြင်းရဲ့ နောက်ထပ်အားသာချက် တစ်ခုကတော့ မိခင်အနေနဲ့ အမြန်ဆုံး ကိုယ့်ရင်သွေးကို နို့ချိုတိုက်ကျွေးနိုင်ခြင်း ပဲ ဖြစ်ပါတယ်။

ခွဲမွေးခြင်းနည်းလမ်းကတော့ မွေးဖွားနေစဉ် နာကျင်မှုမရှိအောင်လို့ မိခင်ကို မေ့ဆေး (သို့) ထုံဆေး ထိုးပေးလိုက်ပါတယ်။ ဒါပေမယ့်လည်း ထုံဆေးပြယ်ပြီဆိုတာနဲ့ မိခင်ဟာ ရက်အနည်းငယ်ကြာတဲ့အထိ နာကျင်မှုကိုခံစားရနိုင်ပါတယ်။ ကလေးငယ်ရဲ့ ခေါင်းက ပုံစံမကျခြင်း၊ မိခင်ရဲ့တင်ပါးဆုံရိုးအတွက် ကလေးရဲ့အရွယ်အစားဟာ ကြီးလွန်းနေခြင်း၊ ကလေးရဲ့ခြေထောက်ဟာမွေးလမ်းကြောင်းဘက်မှာရှိနေခြင်း၊ ကလေးဟာ ကန့်လန့်ဖြတ်အနေအထားရှိနေခြင်း စတဲ့ အခြေအနေများအပြင် မိခင်မှာ ကိုယ်ဝန်ဆိပ်တက်ခြင်း၊ နှလုံးရောဂါ၊ အချိန်မတိုင်ခင်ရေမြွှာအိတ်ပေါက်ခြင်း စတာတွေ ဖြစ်ခဲ့တယ်ဆိုရင် ခွဲမွေးခြင်းနည်းလမ်းကို ရွေးချယ်ကြပါတယ်။

မွေးဖွားမှုနည်းလမ်းနှစ်မျိုးစလုံးဟာ မိခင်ရော ကလေးအတွက်ပါ နောက်ဆက်တွဲ ပြဿနာတွေ ဖြစ်စေနိုင်ပါတယ်။ ဒါကြောင့် မမွေးခင်အချိန်ကတည်းက ဘယ်နည်းလမ်းနဲ့မွေးတာက အဆင်အပြေ ဆုံးဖြစ်မယ်ဆိုတာကို ဆုံးဖြတ်ပေးနိုင်တဲ့ သက်ဆိုင်ရာ အထူးကုဆရာဝန်ကြီးများရဲ့ ကုသစောင့်ရှောက်မှုကို ရယူဖို့ လိုအပ်ပါတယ်။

OB Stat Team လို့ခေါ်တဲ့ အရေးပေါ်သားဖွားစောင့်ရှောက်မှုအဖွဲ့ ကို ကြားဖူးကောင်း ကြားဖူးကြမှာပါတယ်။ တချို့ကတော့ ဒါနဲ့ပတ်သက်ပြီး မသိသေးတာလည်း ရှိနိုင်ပါ တယ်။ OB Stat Team တစ်ခုမှာ သားဖွားအထူးကုဆရာဝန် ၊ မေ့ဆေးပညာရှင်၊ ကလေးဆေး ပညာနဲ့ပတ်သက်ပြီးအထူးပြုလေ့လာထားတဲ့ ကလေးအထူးကု ဆရာဝန်များ၊ နယ်ပယ် ပေါင်းစုံမှာအတွေ့အကြုံရှိပြီးသား သူနာပြုများ စသဖြင့် ပေါင်းစပ်ပါဝင်ပါတယ်။ အဆိုပါ အဖွဲ့ဟာ မွေးဖွားမယ့်မိခင်နဲ့ပတ်သက်တဲ့ အရေးပေါ် ကျန်းမာရေးကိစ္စများပေါ်ပေါက်ခဲ့ပါ က မိနစ်(၂၀)အတွင်း လုပ်ဆောင်ပေးမှာဖြစ်ပြီး သားဖွားအထူးကုဆရာဝန်မှ ခွဲမွေးဖို့ သင့် မသင့် ဆုံးဖြတ်မှာဖြစ်ပါတယ်။ လက်ရှိ အနေအထားအရ ဆေးရုံအများအပြားမှာ ကျွမ်းကျင်တဲ့ OB Stat Team တစ်ခုရှိဖို့ လူအင်အားမရှိကြပါဘူး။

လက်ရှိအချိန်မှာ ခွဲမွေးခြင်းအတွက် မေ့ဆေးထက် ထုံဆေးကို ပိုပြီး ကျယ်ကျယ်ပြန့် ပြန့် အသုံးပြုလာကြပါတယ်။ ဘာလို့လဲဆိုတော့ မေ့ဆေးဟာ ကလေးငယ်ရဲ့ အဆုတ် ထဲအထိ ပျံ့နှံ့နိုင်ပြီး ကလေးငယ်ရဲ့ ငိုကြွေးခြင်းနဲ့ အသက်ရှူခြင်းအပေါ်မှာ ပြဿနာ ဖြစ်စေနိုင်ပါတယ်။ ဒါကြောင့်မေ့ဆေးကို အရေးပေါ်အခြေအနေ(သို့) ထုံဆေးသုံးလို့ မရတဲ့အခြေအနေမှသာ အသုံးပြုကြပါတယ်။

ထိုင်းနိုင်ငံနဲ့တခြားနိုင်ငံများရဲ့ လေ့လာဆန်းစစ်ချက်များအရ ထုံဆေးဟာ အသုံးပြု လိုက်တဲ့သူအတွက် ရေရှည်မှာ ခါးနာခြင်းပြဿနာကို မဖြစ်စေကြောင်း သိရပါတယ်။ တကယ်တမ်းမှာ ထုံဆေးကြောင့် ခါးကိုက်ခါးနာခံစားရတယ်ဆိုတာဟာလည်း နို့တိုက်နေ စဉ်အတွင်းမိခင်ရဲ့အနေအထား၊ လေးလံတဲ့ပစ္စည်းများကို ပုံစံမမှန်ဘဲ မ မိခြင်း စတဲ့ မိခင်ရဲ့ အပြုအမူများကြောင့်သာ ဖြစ်ပါတယ်။

သားဖွားမီးယပ်အထူးကုဆရာဝန်ကြီးများရှိတဲ့ ဆေးရုံကို ဦးစားပေးစဉ်းစားဖို့ အကြံပြုလိုပါတယ်။ ဒါ့အပြင် (၂၄)နာရီပတ်လုံး မေ့ဆေးဆရာဝန် အမြဲရှိနေပြီး အရေးပေါ်ကျန်းမာရေးကိစ္စများဖြစ်လာရင် မိနစ် (၂၀)အတွင်း ကူညီလုပ် ဆောင်ပေးနိုင်တဲ့ OB Stat Team အသင့်ရှိနေတဲ့ ဆေးရုံကို ရွေးချယ်သင့်ပါတယ်။ ကလေးမွေးဖို့အကောင်းဆုံးဆိုတဲ့ ဆေးရုံများမျာ မွေးဖွားပြီးပြီးချင်း စောင့်ရှောက်မှု တွေပြုလုပ်ပေးနိုင်တဲ့ ကလေးအထူးကုဆရာဝန်တွေ ရှိရပါမယ်။ ဒါ့အပြင် ကလေးငယ် တွေမှာ ရောဂါပြဿနာတစ်ခုခုရှိလာခဲ့ရင် ကုသစောင့်ရှောက်မှုတွေပြု လုပ်ပေးနိုင်တဲ့ နယ်ပယ်ပေါင်းစုံ ကလေးအထူးကုဆရာဝန်တွေလည်း ရှိသင့်ပါတယ်။

Photo Credit: jmayer1129 via Compfight cc