ပြဿနာက ပုံမှန် စစ်နေကျအတိုင်း PSA (ဆီးကျိတ်မှထုတ်ပေးတဲ့ပရိုတိန်းတစ်မျိုး) ပမာဏ စစ်ဆေးတာကနေ စခဲ့တာဗျ ။ ဒီလိုစစ်ဆေးဖို့ကို ကျွန်တော့်အမျိုးတွေနဲ့ ပြင်သစ်က ကျွန်တော့်ရဲ့ဆရာဝန်က တိုက်တွန်းခဲ့တာပါ။ PSA ပမာဏက လက်ခံနိုင်တဲ့ပမာဏ 3ng/ml လို့ ရလဒ်ထွက်လာခဲ့ပေမယ့် ဆရာဝန်က အထူးကုနဲ့ထပ်ပြဖို့ အကြံပေးခဲ့တယ်။ ကျွန်တော်ပြနေကျ ပြင်သစ်အနောက်ပိုင်း Trappes မှာရှိတဲ့ ပုဂ္ဂလိက ဆေးရုံက ဆီးရောဂါအထူးကုဆရာဝန်နဲ့ တွေ့ဖို့ အစီအစဉ်ကို ဖျက်လိုက်တယ်။ အဲဒီဆရာဝန်က စာနာစိတ်နည်းတယ်။ ကျွန်တော့်ကိုသူ့ရဲ့ Schedule ထဲကနံပါတ် တစ်ခုလို့ပဲမြင်တာ ။ စအိုလမ်းကြောင်းစစ်ဆေးမှုရလဒ် ( Digital Rectal Examination – DRE) ကို ခက်သွက်သွက်ကြည့်တယ်။ မြန်မြန်ကောက်ချက်ချပြီး အသားစစစ်ဖို့နဲ့ လိုအပ်ရင် နောက်ဆက်တွဲ အနေနဲ့ ဆီးကျိတ်ခွဲထုတ်ရမယ်ပဲပြောတယ်။
ကျွန်တော် တစ်ဖက်ကပြန်စဉ်းစားပြီး အချိန်တိုအတွင်း ဘာမှမလုပ်ဖို့ ဆုံးဖြတ်ခဲ့တယ်။
နောက်တစ်နှစ်အကြာ PSA ထပ်စစ်ကြည့်လိုက်တာ 18 ng/ml ထိ ခုန်တက်သွားတယ်ဆိုတော့ သေချာတယ် ဒါ ဆီးကျိတ်ကင်ဆာဖြစ်ဖို့ ရာခိုင်နှုန်းများသွားပြီ။ ကျွန်တော့်ဆီးကျိတ်ကို MRI ရိုက်ကြည့်တော့ ဆီးကျိတ်ဘယ်ဘက်ခြမ်း မသင်္ကာစရာ ဆဲလ်လေးတွေ တွေ့ခဲ့ရတယ်။ ကျွန်တော့်ကို Versailles မှာရှိတဲ့ Franciscaines Hospital က နောက်ထပ်ဆီးရောဂါ အထူးကုဆရာဝန်ဆီ ထပ်လွှဲတယ်။ ဒီတစ်ခါဆရာဝန်က ကျွန်တော့်အတွက်သေချာအချိန်ယူပြီး စမ်းသပ်စစ်ဆေးပေးတယ် ။ ကျွန်တော့် အခြေအနေကိုလည်း သေချာနာလည်အောင်ရှင်းပြတယ်။ ဒီတစ်ကြိမ်မှာ ကျွန်တော် အသားစ ယူဖို့ လက်ခံခဲ့တယ်။ ရလဒ်ကတော့ ကျွန်တော့်မှာ အန္တရာယ်ရှိတဲ့ ကင်ဆာဆဲလ်တွေက Gleason score အဆင့် (၆) ရှိနေတာကို တွေ့ခဲ့ရတယ်။ (Gleson Score ဟာ ဆီးကျိတ်ကင်ဆာ အဆင့်သတ်မှတ်တဲ့ system တစ်ခုဖြစ်ပြီး ၆ မှ ၁၀ အတွင်း သတ်မှတ်ထားကာ score များလေ ကင်ဆာ အဆင့်ပိုဆိုးလေဖြစ်ပါတယ်) ဆီးရောဂါအထူးကုဆရာဝန်က ဆီးကျိတ်တစ်ခုလုံးကို ခွဲထုတ်လိုက် ဖို့ပြောတယ်။ ပြီးတော့ ကျွန်တော့် ရောဂါအခြေအနေကို ဆေးရုံကော်မရှင်ကိုတင်ပြပြီး ရောဂါရှာဖွေမှုနဲ့ ကုသမှုတွေလုပ်ဖို့ အတည်ပြုခဲ့ပြီး ခွဲစိတ်ဆရာဝန်နဲ့ ရက်ချိန်းယူခဲ့တယ်။
ဒါပေမယ့် အဲဒီကော်မရှင်ဆိုတာ ဆေးရုံက ဆီးရောဂါအထူးကုဆရာဝန်တွေ ၊ ဓာတ်ရောင်ခြည်ကု ဆရာဝန်တွေ ၊ ခွဲစိတ်ဆရာဝန်တွေနဲ့ ဖွဲ့စည်းထားတဲ့အဖွဲ့ဆိုတာကို ကျွန်တော်သိခဲ့ရတယ်။ သူတို့ပဲ တင်ပြ သူတို့ပဲဆုံးဖြတ်ဆိုတဲ့ ပုံစံပေါ့။
နောက်တစ်ခုက Da Vinci robot ( ခွဲစိတ်ကုသမှုများပြုလုပ်ပေးသောစက်ရုပ်စနစ်) နဲ့တောင် ခက်ခဲမှုနည်းပြီးလွယ်ကူရိုးရှင်းတဲ့ခွဲစိတ်မှု(MIS) တွေလုပ်နေတဲ့အချိန် သူတို့က သမရိုးကျခွဲစိတ်မှုနဲ့ ကုသဖို့ဆုံးဖြတ်ခဲ့တာက နည်းနည်း စဉ်းစားစရာဖြစ်စေတယ်။
ဆီးကျိတ်ကင်ဆာနဲ့ပတ်သက်ပြီး ပိုသိရဖို့ အထွေထွေကုဆရာဝန်နဲ့ဆွေးနွေးသလို အင်တာနက်က နေလည်း တီးခေါက်ကြည့်တယ်။ အဓိကကျန်းမာရေးဝန်ဆောင်မှုများရဲ့ အကျိုးအမြတ်အတွက် မားကတ်တင်း ကို အထူးပြု စောင်ကြည့်နေတဲ့ ကုမ္ပဏီတွေရဲ့ သိပ္ပံနည်းကျ တွက်ချက် ထုတ်ပြန်မှု တွေအရ ဆီးကျိတ်ခွဲထုတ်တာနဲ့ပတ်သက်ပြီး ရစရာမရှိအောင်ရေးထားတဲ့ ပြင်သစ်ကလော်ဘီ သတင်းတွေကို မထင်မှတ်ဘဲသွားတွေ့တယ်။ အဲဒီအချက်အလက်တွေအရဆိုရင် ဆီးကျိတ်ခွဲထုတ်တဲ့ ခွဲစိတ်မှု လုပ်သည်ဖြစ်စေ မလုပ်သည်ဖြစ်စေ သေဆုံးမှုနှုန်းကအတူတူနီးပါးပဲ။ ပြီးခဲ့တဲ့ (၂၅)နှစ်အတွင်း ပြင်သစ်မှာ ဆီးကျိတ်ခွဲထုတ်မှုနှုန်းက တစ်နှစ်ကို (၇၀၀၀) ကနေ (၂၈၀၀၀) အထိ သိသိသာသာ မြင့်တက်ခဲ့တယ်။ ဆီးကျိတ်ခွဲထုတ်လိုက်တာက သူတို့ဘဝသက်တမ်းအပေါ် တိကျတဲ့အကျိုး သက်ရောက်မှု မရှိပေမယ့် သူတို့ရဲ့နေ့စဉ်ဘဝမှာ ပန်းသေပန်းညှိုးခြင်း ၊ ဆီးမထိန်းနိုင်ခြင်း စတဲ့ ပြဿနာတစ်ချို့ ရှိလာခဲ့ပါတယ်။
ဒီလိုအချက်တွေကြောင့် ပြင်သစ်ကျန်းမာရေးထိပ်တန်းကျန်းမာရေးအာဏာပိုင်တွေက ပုံမှန်စစ်ဆေးမှု တွေကို အကျင့်မလုပ်ဖို့ မှတ်ချက်ပေးခဲ့ပါတယ်။
အတွေးပေါင်းသောင်းခြောက်ထောင်စဉ်းစားပြီးနောက်မှာ ကျွန်တော် ခွဲစိတ်မှုမလုပ်ဖို့ ဆုံးဖြတ်ခဲ့တယ်။ အဲဒီမှာ ထူးခြားတာတစ်ခုက ကျွန်တော့်စိတ်ကိုပြောင်းလဲဖို့နဲ့ ဆုံးဖြတ်ချက်ကိုနားလည်ဖို့ ဆေးရုံက လူတွေဖုန်းမခေါ်လာခဲ့ဘူး။
